Սեպտոպլաստիան վիրահատական միջամտություն է ուղղելու քթի միջնապատը՝ բարելավելու ոսկրի և աճառի տեղադրությունը, որն առանձնացնում է քթանցքերը: Սեպտոպլաստիայի արդյունքում միջնապատն ուղղվում է և տեղակայվում քթի կենտրոնում: Հնարավոր է, որ նախքան ձևի ուղղումը միջնապատից որևէ հատված կտրելու և հեռացնելու կարիք լինի:

Վիրահատության պլանավորման ընթացքում բժիշկը դիտարկում է ախտանիշները՝ շնչառական բարդությունները և քթի ձևի առանձնահատկությունները: Խորհրդակցեք բժշկի հետ ակնկալվող փոփոխությունների մասին:

Քթի միջնապատի որոշակի թեքությունը տարածված երևույթ է: Սակայն, երբ դրա թեքությունը մեծ է, կարող է քթի փակվածություն առաջանալ, որը նվազեցնում է օդի ներհոսքը, ինչը կարող է շնչառական բարդություններ առաջացնել քթի մեկ կամ երկու կողմերում:

Քթի միջնապատի սխալ դիրքը առաջացնում է քթի չորություն, և այն երբեմն պատճառ է դառնում կեղևազատման և արյունահոսության: Սեպտոպլաստիայի արդյունքում՝ աճառի հղկմամբ  կամ փոխարինմամբ ամրանում է քթի միջնապատը, ոսկրը կամ երկուսը միաժամանակ:

Եթե առկա շնչառական բարդությունները նշանակալի ազդեցություն ունեն կյանքի, ապրելակերպի վրա, ապա այս դեպքում խորհուրդ է տրվում դիմել վիրահատության:

Ինչպես յուրաքանչյուր վիրահատական միջամտություն Սեպտոպլաստիան ենթադրում է որոշակի ռիսկեր, ինչպիսիք են՝ արյունահոսությունը, վարակը, կամ օրգանիզմի բացասական արձագանքը անզգայացմանը: Սեպտոպլաստիայի մյուս ռիսկերն են՝

• Վիրահատությունից հետո նախկին ախտանիշների առկայություն
• Ուժեղ արյունահոսություն
• Քթի ձևի փոփոխություն
• Միջնապատի բացվածք
• Հոտառության նվազում
• Քթանցքում հեմատոմայի առաջացում
• Վերին շուրթի կամ ատամնաշարի ժամանակավոր թմրածություն

Առաջացած բարդություններից որոշներն ուղղելու կամ ցանկացած արդյունքին հասնելու համար հնարավոր է, որ լրացուցիչ վիրահատության կարիք լինի: Խորհրդակցեք վիրաբույժի հետ անհատական ռիսկերի մասին նախքան վիրահատությունը:

Սեպտոպլաստիայի նախապատրաստական ընթացքում հարկավոր է վիրաբույժի հետ քննարկել վիրահատության առավելություններն ու ռիսկերը: Սովորաբար այդ քննարկումը կարող է լինել հետևյալ հարցերի շուրջ:

Բժշկական պատմություն: Բժիշկը հարցեր է տալիս ունեցած հիվանդությունների, ինչպես նաև ընդունվող դեղամիջոցների մասին:

Ֆիզիկական զննում: Բժիշկն անցկացնում է ֆիզիկական հետազոտություն, ներառյալ համապատասխան թեստավորումները:

Ֆոտոնկարահանում: Տարբեր անկյուններից կարող է քթի ձևի նկարներ վերցվել: Բժիշկը կարող է դրանք օգտագործել քննարկման համար նախքան Սեպտոպլաստիան, կամ վիրահատության արդյունքները համեմատելու համար:

Ակնկալիքներ: Քննարկեք ձեր սպասելիքները բժշկի հետ: Բժիշկը ներկայացնում է Սեպտոպլաստիայի փոփոխությունները, և ինչպիսին կլինեն դրանք ձեզ համար:

Սեպտոպլաստիան ոսկրի կամ աճառի հղկման, վերատեղադրման կամ փոխարինման միջոցով ուղղում է քթի միջնապատը: Վիրաբույժը կատարում է վիրահատությունը քթի մեջ կտրվածքներ անելով: Սովորաբար կարիք է լինում քթանցքերի միջև փոքր կտրվածք անելու: Եթե քթոսկրերը վնասված են և միջնապատը մի կողմ են սեղմում, կարիք է լինում հղկելու ոսկորը, որպեսզի հնարավոր լինի այն ճիշտ տեղադրել: Բաժանիչ ներդիրները փոքրիկ, ամրապնդող ամրակներ են, որոնք կարող են օգտագործվել ուղղելու շեղված հատվածը, երբ խնդիրը քթի միջնապատի երկայնքով է: Երբեմն այս քայլերն անհրաժեշտ են միջնապատն արդյունավետ ուղղելու համար:

Վիրահատության ընթացքը

Սեպտոպլաստիան կատարվում է տեղային կամ ընդհանուր անզգայացմամբ:

Տեղային անզգայացում: Այս դեպքում անզգայացվում է միայն քթի հատվածը: Վիրաբույժը անզգայացնող է ներարկում ռնգային հյուսվածքներ: Հնարավոր է ներերակային ներարկում: Դեղամիջոցը անզգայացնում է՝ պահպանելով գիտակից վիճակը:

Ընդհանուր անզգայացում: Ընդհանուր անզգայացումը կատարվում է ներերակային ներարկմամբ: Անզգայացման այս տարբերակը ազդում է ամբողջ մարմնի վրա՝ ներառելով ժամանակավոր անգիտակից վաճակը:

Նախապես քննարկեք բժշկի հետ անզգայացման տարբերակը:

Վիրահատության ընթացքում կտրվածքը կարվում է ներծծվող կարով: Միջնապատը ֆիքսելու համար հնարավոր է քթանցքերում փափուկ սիլիկոնե սպլինտեր տեղադրվեն: Արյունահոսությունը կանխելու համար բժիշկը կարող է քթին ձգող, ֆիքսող կապ դնել:

Վիրահատությունից հետո հանգստի սենյակում, անձնակազմը կանցկացնի զննում: Դուրս գրումը կատարվում է նույն օրը:

Վիրահատությունից հետո՝

Հետագա արյունահոսությունը կանխելու համար հնարավոր է բժիշկը խորհուրդ տա հետևել հատուկ ընթացակարգի վիրահատությունից մի քանի շաբաթվա ընթացքում։ Կախված ձեր վիրահատության ծավալից, ձեզ խորհուրդ կտրվի հետևել դրանցին մի քանիսին՝

• Խուսափեք խիստ ծանրաբեռնվածությամբ գործողություններից, ինչպիսիք են, օրինակ՝ աէրոբիկան և վազքը: Սա իջեցնում է արյան ճնշումը, ինչը կարող է հանգեցնել քթի արյունահոսության:
• Խուսափեք քթին հարվածներից
• Գլուխը բարձր դիրքով քնեք
• Բաց պարանոցով ազատ հագուստ կրեք

Վիրահատության արդյունքը կայուն է, սակայն երբեմն միջնապատն ու աճառը կարող են շարժվել ժամանակի ընթացքում և կորցնել իրենց ձևը: Քթի աճառը հարաբերական կայուն է երեքից վեց միս: Այնուամենայնիվ, որոշակի փոփոխություններ կարող են առաջանալ վիրահատությունից մեկ տարի հետո կամ ավելի ուշ ժամանակահատվածում: Մարդկանց զգալի մասը նշում է, որ Սեպտոպլաստիան բարելավել է իրենց շնչառությունը:

Որոշները նշում են, որ ախտանիշները պահպանվել են անգամ վիրահատությունից հետո։ Այս պարագայում, ցանկալի արդյունքի հասնելու համար, կարիք է առաջանում կրկնելու Սեպտոպլաստիան: